VMRO përmes drejtorit të spitalit në Strugë i dërgon mesazh Qyrës: “Ne jemi zot shtëpie, për shqipen nuk ka vend”
Takimi i kandidatit për kryetar komune, Mendi Qyra, me drejtorin e Spitalit të Përgjithshëm të Strugës, Dr. Vlladimir Bunçeski, nuk kaloi pa simbolikë politike. Në një qytet me shumicë shqiptare dhe në një institucion ku rreth 50% e të punësuarve janë shqiptarë, Bunçeski – përfaqësues i VMRO-së – i dorëzoi Qyrës një certifikatë mirënjohjeje të shkruar vetëm në gjuhën maqedonase.
Në tavolinë ishte vendosur edhe flamuri me diellin e Verginës, simbol i nacionalizmit maqedonas, që prej dekadash përdoret si shenjë e pretendimeve historike të VMRO-së dhe qarqeve që përjashtojnë elementin shqiptar nga skena publike.
Ky veprim shihet si një mesazh i qartë politik: VMRO do të mbetet “zot shtëpie” në Strugë, ndërsa gjuha shqipe nuk ka vend në institucionet lokale. Përkundër sloganit “Për Strugën” që Qyra promovon, pamjet nga takimi flasin ndryshe – një realitet ku shqiptarët, edhe pse shumicë, përballen me nënvleftësim simbolik dhe gjuhësor.