Gjendja në Spitalin e Përgjithshëm të Strugës është alarmante dhe e mjerueshme. Këtë realitet e konfirmon edhe kandidati për kryetar komune, Mendi Qyra, i cili thekson se pasojat i vuajnë çdo ditë mbi 270 të punësuar, por mbi të gjitha pacientët që presin shërbime mjekësore dinjitoze.
“Është fakt që shëndetësia është në ingerenca të Ministrisë, por kjo nuk do të thotë që Komuna duhet të qëndrojë duarkryq. Përkundrazi, Komuna ka detyrim të punojë për ndryshim”, u shpreh Qyra.
Ai shton se ndryshimi i këtij realiteti është një nga prioritetet e tij kryesore, me plan konkret, të cilin sot e ka diskutuar në detaje me drejtorin e spitalit, Dr. Vlladimir Bunçeski.
Sipas tij, spitali i Strugës nuk ka nevojë vetëm për kritika e premtime, por për zgjidhje të menjëhershme që do të rikthejnë besimin e qytetarëve tek sistemi shëndetësor lokal.