Presidenti rus ka deklaruar se kjo armë është “e pathyeshme” nga sistemet aktuale dhe ato të ardhshme të mbrojtjes raketore
Rusia duket se po përgatitet të testojë raketën e saj të re cruise me armë bërthamore – e quajtur “Burevestnik” – sipas dy studiuesve amerikanë dhe një burimi perëndimor të sigurisë, raporton Reuters.
Kjo ndodh ndërkohë që presidenti rus Vladimir Putin përgatitet për bisedimet me presidentin amerikan Donald Trump të premten në Alaskë.
Jeffrey Lewis nga Middlebury Institute of International Studies në Kaliforni dhe Decker Eveleth nga organizata CNA në Virxhinia, arritën në këtë përfundim në mënyrë të pavarur duke studiuar imazhe të marra në javët e fundit nga Planet Labs – një kompani komerciale satelitore.
Të dy u pajtuan se fotografitë tregonin aktivitet të gjerë në sitin e testimit Pankovo, në arkipelagun Barents të Novaya Zemlya, përfshirë rritje të pranisë së personelit, pajisjeve, si dhe anijeve dhe avionëve që kanë qenë të përfshirë në testimet e mëparshme të raketës 9M730 Burevestnik (Storm Petrel).
Një burim perëndimor i sigurisë, që preferoi të mbetet anonim, konfirmoi për Reuters se Rusia po përgatitet për testimin e “Burevestnik”.
Lewis shtoi se një test mund të ndodhë gjatë kësaj jave, duke rritur mundësinë që ai të mbulojë vëmendjen gjatë samitit Trump–Putin në Alaskë.
Putin ka deklaruar se kjo armë — e quajtur SSC-X-9 “Skyfall” nga NATO — është “e pathyeshme” nga sistemet aktuale dhe ato të ardhshme të mbrojtjes raketore, pasi ka një rreze pothuajse të pakufizuar dhe një trajektore fluturimi të paparashikueshme.