Ai potencoi se partitë politike në Kosovë aktualisht po bëjnë kalkulime të ngushta partiake, duke lënë mënjanë interesin kombëtar
Kryetari i Nismës Socialdemokrate, Fatmir Limaj, ka vlerësuar se Lëvizja Vetëvendosje – si partia e cila doli e para në zgjedhjet parlamentare të 9 shkurtit – nuk ka shumicë për qeveri, edhe nëse kalkulohen tri votat e Nismës Socialdemokrate.
Sipas tij ngërçi politik disa mujor po ndodh pikërisht për këtë arsye.
Duke komentuar qëndrimin e kryeministrit në detyrë të Kosovës, Albin Kurtit, se LVV-ja ka vota për qeveri, por jo edhe për kryekuvendar, Limaj potencoi se ai parti që ka shumicën për qeveri e ka shumicën edhe për Kuvend.
“Duhet marrëveshje politike, e cila nuk është arritur ende”, tha ai në një intervistë për RTV Dukagjini.
Ai potencoi se partitë politike në Kosovë aktualisht po bëjnë kalkulime të ngushta partiake, duke lënë mënjanë interesin kombëtar.
“Mos me pas institucione për një votë më shumë, se ‘nëse bëhemi ne bashkë humbasin dy deputetë, e nëse nuk bëhemi bashkë, fitojmë dy deputetë’, shihe për çfarë po kalkulohet, sa e ngushtë është perspektiva”, kritikoi ai.
I pyetur për vendimin e fundit të Gjykatës Kushtetuese, Limaj tha se nëse deputetët nuk arrijnë të zgjedhin kryeparlamentarin brenda afatit 30 ditor, duhet të krijohet mundësi për të tjerët që të propozojnë kandidatë dhe, nëse edhe pas 60 ditësh nuk ka rezultate, 120 deputetët aktual duhet të de-certifikohen.