116 punësime në tre institucione shtetërore, vetëm 1 shqiptar. Dhe ai me gjasë, ndonjë familjar i afërt i ndonjë funksionari të VLEN-it.
Në radhët më të fundit të pranimeve në Armatën dhe Ministrinë e Mbrojtjes, janë punësuar 71 maqedonas dhe vetëm 1 shqiptar. Ky nuk është më një incident – është një politikë e përjashtimit të pastër dhe të heshtur, që po zbatohet sistematikisht ndaj shqiptarëve në Maqedoninë e Veriut.
Në Agjencinë për Kadastrën e Pasurisë së Paluajtshme, nga punësimet dhe avancimet e fundit: 25 maqedonas, 0 shqiptarë. Në Agjencinë për Nxitjen e Zhvillimit të Bujqësisë: 20 maqedonas, 0 shqiptarë.
Ky është bilanci i vërtetë i një qeverisjeje që premtoi “barazi” dhe “zhvillim për të gjithë”, por po e kthen shtetin në një instrument të pabarazisë flagrante.
VLEN-i, që në fushatë fliste për 2.500 punësime për shqiptarët, deri tani ka sjellë 0. Po, zero. E vetmja gjë që po prodhohet në ritme të frikshme është gënjeshtra politike dhe heshtja bashkëfajtore përballë padrejtësisë.
Ndërsa VMRO-ja ecën me agjendën e vet unilaterale, VLEN-i po hesht, po dekoron ministrat me fjongë të zbukuruara dhe po i shet shqiptarëve “arritje” që nuk ekzistojnë.
Shqiptarët janë kthyer në spektatorë të një pazaresh të ulëta, ku postet ndahen për një rreth të ngushtë të privilegjuar, ndërsa masa e qytetarëve injorohet, diskriminohet dhe shtypet me statistika që flasin vetë.
Ky është realiteti. Dhe ky realitet nuk mbulohet dot më me foto zyrtare dhe buzëqeshje fallco.
Koha e llogaridhënies do të vijë. Jo në formën e konferencave për shtyp, por me bilanc real dhe ndëshkim politik të atyre që kanë tradhtuar besimin e shqiptarëve. Sepse heshtja përballë përjashtimit nuk është maturi – është bashkëpunim me padrejtësinë.