Kryetarja e Qytetit të Shkupit, Danella Arsovska, ka vazhduar me akuzat dhe me zbulimin e ndërtimeve pa leje në Komunën e Çairit. Në postimin e saj më të fundit në rrjetet sociale, Arsovska ka drejtuar akuza të reja ndaj kryetarit të Komunës, Visar Ganiu.
“Le t’i thotë dikush Visar Ganiut se as kjo nuk i është lënë trashëgimi nga gjyshja, sepse ai pretendonte se ndërtimet pa leje i ka trashëguar, ndërkohë që këtu tani po ndërtohet. 50 objekte të reja janë në ndërtim aktualisht dhe askush nuk reagon. Nuk kanë leje, nuk kanë projekte, vjedhin ujë, vjedhin rrymë. Ju paguani taksa dhe skanoni fatura fiskale,” – ka shkruar sot Arsovska, duke paraqitur pamje satelitore nga ndërtimet në territorin e Çairit.
Ajo thekson se është detyrë e saj të raportojë kur dëmtohet buxheti i qytetit.
“Të punësuarit në administratën e Qytetit të Shkupit dhe unë si kryetare, kur kemi informacion apo kallëzim se dëmtohet buxheti i qytetit dhe kur jemi dëshmitarë të provave për dokumente zyrtare të falsifikuara, jemi të obliguar me ligj që ta paraqesim këtë. Përndryshe, me heshtje bëhemi bashkëpjesëmarrës në krimin e legalizimeve të paligjshme,” – ka shtuar Arsovska në postimin e saj.