Një deklaratë e fortë dhe tronditëse ka ardhur nga Lirim Mehmetaj, i cili në një postim publik ka goditur rëndë kryeministrin e Kosovës, Albin Kurti, duke e akuzuar për përfshirje të drejtpërdrejtë në skenën politike në Maqedoninë e Veriut – me qëllim, sipas tij, për ta përçarë dhe poshtëruar faktorin politik shqiptar atje.
“Dëgjoni partnerët e Albin Kurtit në Maqedoni të Veriut… Gjithë ai investim, me financa e me njerëz, për t’i sharë, ofenduar, përçmuar e diskriminuar sërish shqiptarët në Maqedoni,” ka shkruar Mehmetaj, duke e cilësuar këtë përfshirje si një sulm të planifikuar politik ndaj interesit kombëtar.
Në deklaratën e tij, Mehmetaj shkon më tej, duke e akuzuar Kurtin se u ka dërguar madje edhe shefin e shtabit zgjedhor partnerëve të tij në Maqedoni, si dëshmi e ndërhyrjes së drejtpërdrejtë nga Prishtina në proceset zgjedhore të shqiptarëve jashtë kufirit të Kosovës.
“Qëllimin e ka pasur gjithmonë t’i kthejë shqiptarët dhe gjendjen e tyre para vitit 2001,” thotë ai, duke aluduar në përpjekjet për të zhbërë arritjet e shqiptarëve pas Marrëveshjes së Ohrit.
Por akuzat nuk ndalen me kaq. Mehmetaj e lidh këtë logjikë edhe me zhvillimet në Kosovë, duke thënë se Albin Kurti po ndjek të njëjtin mision për të na kthyer para vitit 1999, para çlirimit të Kosovës.
Në fund, ai lëshon një akuze alarmante, duke aluduar për retorikë nxitëse ndaj shqiptarëve dhe qëndrimin pasiv të qeverisë maqedonase, për të cilën thotë se është aleate e Kurtit:
“Derisa tifozët bërtasin për mënyra kreative të eliminimit të shqiptarëve, kryeministri maqedonas, aleati i Albin Kurtit, duartroket.”