Ish-ministri i Jashtëm i Shqipërisë, Ditmir Bushati, ka reaguar ashpër ndaj incidenteve të rënda me përmbajtje antishqiptare që ndodhën gjatë një ndeshjeje basketbolli në Kumanovë, Maqedonia e Veriut. Ai i ka cilësuar thirrjet si “Shqiptar i mirë, shqiptar i vdekur” dhe “Dhoma gazi për shqiptarët” si një manifestim të pastër të urrejtjes etnike.
Sipas Bushatit, këto akte nuk janë thjesht fyese, por përbëjnë një kërcënim serioz për bashkëjetesën demokratike dhe barazinë mes shqiptarëve dhe maqedonasve, të cilët janë dy komunitete shtetformuese në Maqedoninë e Veriut.
Ai ka kritikuar ashpër edhe heshtjen e zyrtarëve të lartë që ishin të pranishëm në ngjarje, duke e quajtur atë “të papranueshme” dhe një tregues se autoritetet nuk kanë nxjerrë mësimet e duhura nga e kaluara.
Bushati e ka mbyllur reagimin e tij me mesazhin: #stopethnichate #ndalourrejtjenetnike.