Deputeti i Kuvendit të Maqedonisë së Veriut dhe pjesë e shumicës qeverisëse, Bekim Qoku, ka reaguar ashpër pas publikimit të një fotografie nga vizita e ministrit të Punëve të Brendshme Pançe Toshkovski në SPB Ohër dhe njësitë përkatëse të sigurisë kufitare.
Në një koment të bërë në grupin e funksionarëve të VLEN, Qoku shpreh indinjatën e tij për mungesën e plotë të shqiptarëve në fotografi dhe, siç thotë ai, në pozita udhëheqëse në kuadër të këtij sektori.
“Nuk shoh asnjë shqiptar në këtë fotografi që ta takoj Toshkon. SPB-Ohër ku bien tre qytete me shumicë shqiptare si Struga, Kërçova dhe Dibra, asnjë pozitë udhëheqëse! Ende s’kemi marrë asgjë si VLEN. Ku qëndron problemi? Apo ende emrat nuk i keni dorëzuar?”, shkruan Qoku.
Ai kritikon drejtpërdrejt partinë e tij dhe strukturat vendimmarrëse për mungesën e angazhimit konkret në përfaqësimin e shqiptarëve në institucionet e sigurisë, duke theksuar se vetëm në Kërçovë është bërë një lëvizje minimale, ndërsa në qytetet tjera – zero veprim.
“Përveç Kërçovës, në qytetet tjera s’kemi bërë asnjë lëvizje”, përfundon ai.
Ky reagim i Qokut hap një debat të ri brenda VLEN dhe qeverisë për ndarjen reale të pushtetit dhe respektimin e përfaqësimit të shqiptarëve në administratën shtetërore. Deri më tani, nuk ka pasur asnjë reagim publik nga ana e VLEN apo nga përfaqësuesit e tjerë qeveritarë.