Arbër Ademi përmes një deklarate për media ka njoftuar se Bujar Osmani do të jetë kandidat i BDI-së për kryetar në Komunën e Çairit, transmeton Portalb.mk.
BDI-ja në mbledhjen e sotme vendosi që kandidat për Komunën e Tetovës të jetë Bajram Rexhepi, ndërsa për Zhelinën do të jetë Emir Sulejmani.
Bartës liste në Gostivar do të jenë Valdet Xhaferi ndërkaq në Strugë Faton Pollozhani.
Kundërshtari i Rexhepit në Tetovë pritet të jetë kryetari aktual Bilall Kasami, i Sulejmanit do të jetë Blerim Sejdiu, ndërsa kundërshtari i Osmanit pritet të jetë ministri aktual, Izet Mexhiti. Ky i fundit ka qenë tri mandate në krye të Çairit si kuadër i BDI-së.
Kujtojmë se, kryetari i Kuvendit, Afrim Gashi ka njoftuar se zgjedhjet lokale pritet të shpallen në gjysmën e parë të muajit gusht. Të njëjtat pritet të mbahen në tetor 2025.
Presidentja e Maqedonisë së Veriut pritet që së shpejti t’i shpallë zgjedhjet lokale. Të qarta janë datat, por jo edhe rregullat sa i përket ndryshimeve të Kodit Zgjedhor për të cilat partitë politike janë bërë lëmsh sepse duhet të votohen me shumicë Badinteri. Propozim-ligjin e parë ua rrëzoi Gjykata Kushtetuese.