Në një deklaratë të ashpër publike, Ziadin Sela ka kritikuar ashpër qeverinë aktuale të përbërë nga koalicioni VLEN dhe VMRO-DPMNE, duke e cilësuar atë si “qeveri antishqiptare”. Ai ka vënë në dukje se programi qeveritar, i cili u votua ditën e formimit të qeverisë, nuk përmban asnjë premtim të dhënë për shqiptarët gjatë fushatës zgjedhore.
“Çfarë po ndodh sot është e pashembullt. Kemi për herë të parë një zëvendëskryeministër dhe ministër për marrëdhënie ndërmjet komuniteteve, i cili vjen nga një komitet serb që nuk përfaqëson as 1% të popullsisë së Maqedonisë së Veriut,” u shpreh Sela.
Ai shtoi se ky pozicion, tradicionalisht i udhëhequr nga shqiptarët përmes Sekretariatit për Marrëveshjen e Ohrit, tani i është dorëzuar një personi të afërt me Beogradin dhe Moskën. “Ky është një individ i afërt me Vuçiçin, që solli Dodiqin në Shkup, dhe që ka lidhje të vazhdueshme me Vullinin dhe Putinin,” theksoi ai.
Ziadin Sela akuzoi drejtuesit e koalicionit VLEN se kanë votuar një qeveri që injoron tërësisht interesat shqiptare. “Asnjë gërmë nga premtimet për shqiptarët nuk është përfshirë në programin qeveritar. Dhe sot, kur largohen nga qeveria, dalin e fajësojnë të tjerët, pa pranuar arsyen e vërtetë pse u larguan,” tha Sela.
Sipas tij, fajësimi i të tjerëve është rruga më e lehtë, por realiteti është i qartë: “Kjo është një qeveri e ndërtuar mbi mashtrime, e votuar nga ju bashkë me ministrat tuaj. Dhe sot, për herë të parë, në vend të shqiptarëve, në pozicionet kyçe futen njerëz të linjave serbo-ruse!