Zëvendëskryeministri dhe një nga liderët e koalicionit VLEN, Izet Mexhiti, ka reaguar ashpër ndaj kritikave dhe qëndrimeve të opozitës shqiptare, duke i akuzuar për shpifje, pavërtetësi dhe mungesë të përgjegjësisë politike.
Në një status të publikuar në rrjete sociale, Mexhiti theksoi se opozita nuk ka thënë asnjë fjalë për çështjet kyçe që prekin drejtpërdrejt interesat e shqiptarëve, përfshirë Ligjin për përfaqësim të drejtë, Ligjin për Medresenë, ndalimin e bixhozit dhe ndarjen e mbi 200 milionë eurove për komunat shqiptare.
“ASNJË FJALË për Ligjin për përfaqësim të drejtë; ASNJË FJALË për Ligjin për Medresenë; ASNJË FJALË për mbylljen e bixhozit; ASNJË FJALË për mbi 200 milion euro për komunat tona”, shkruan ai.
Në vend të një debati konstruktiv, Mexhiti thotë se opozita është përqendruar në sulme të pavërteta dhe tensione të kota për Ligjin për policinë. Ai e cilëson opozitën si “të acarruar, me frustracione dhe nën tension konstant”.
Në fund të deklaratës, Mexhiti thekson angazhimin personal për të rikthyer nenin për përfaqësimin e drejtë përmes një amandamenti në Parlament. “Për këtë jam zotuar personalisht,” deklaron ai, duke shtuar me ironi: “Veç rrini rahat!”
Deklarata e tij vjen në një moment të rëndësishëm për çështjet e përfaqësimit dhe të drejtave të shqiptarëve në institucionet shtetërore, ndërsa koalicioni VLEN po synon të konkretizojë disa nga zotimet e tij strategjike.