Shkup – Ansambli i njohur shqiptar “Emin Duraku” nga Shkupi ka shkruar histori në skenën kulturore ndërkombëtare duke fituar tre çmime të para brenda vetëm një muaji, kulmuar me Grand Trophy 2025 në festivalin prestigjioz në Pitești, Rumani.
Pas triumfeve në Kosovë dhe Bullgari, grupi i të rinjve artistë kurorëzoi suksesin në Rumani, duke përfaqësuar me dinjitet, pasion dhe krenari kulturën shqiptare përpara publikut ndërkombëtar. Me performanca që ndezën skenën dhe ngjallën emocione të forta, ata nuk fituan vetëm trofe – fituan zemrat e publikut në gjithë Evropën!
“Me çdo hap mbi skenë, ata i dhanë zë rrënjëve tona dhe frymë gjeneratave të reja. Ky nuk është vetëm një sukses artistik – është një fitore për identitetin dhe shpirtin shqiptar”, u shprehën drejtuesit e ansamblit.
Suksesi i “Emin Duraku” nuk do të ishte i plotë pa kontributin e dy koreografëve të palodhur, Xheneta dhe Avni, të cilët janë cilësuar si “zemra e këtij suksesi”. Çdo lëvizje, çdo detaj, mbartte punën dhe përkushtimin e tyre artistik.
