Konkursi i fundit i shpallur nga Ministria e Bujqësisë ka ngjallur reagime të forta në opinionin publik, pasi nga të gjithë të emëruarit – këshilltarë shtetërorë, udhëheqës sektorësh, drejtorë njësish dhe këshilltarë të zakonshëm – asnjë nuk është shqiptar. Rezultati i këtij procesi: 10 të emëruar, 0 shqiptarë.
Ky fakt po cilësohet si një tjetër dëshmi për atë që perceptohet si përjashtim sistematik i shqiptarëve nga institucionet publike. Sipas kritikëve, qeveria aktuale po ndjek një agjendë të rrezikshme që synon të zbehë rolin e shqiptarëve si faktor shtetformues në Maqedoninë e Veriut.
Akuzat për diskriminim institucional janë shtuar në muajt e fundit, sidomos pas vendimeve të ndryshme administrative dhe veprimeve të institucioneve si Gjykata Kushtetuese, e cila – sipas vëzhguesve – ka filluar të cenojë themelet e Marrëveshjes së Ohrit, një dokument kyç për balancimin ndëretnik në vend.
Përveç përjashtimit nga pozitat drejtuese, janë përmendur edhe përpjekje për të shfuqizuar përdorimin zyrtar të gjuhës shqipe, për të eliminuar bilingualizmin në institucione dhe për të mohuar të drejtën e vetëdeklarimit etnik.
Aktualisht, përfaqësimi shqiptar në disa institucione është reduktuar në simbolikë, ndërsa pozicionet kyçe po zëvendësohen nga kuadro që nuk përfaqësojnë realitetin multietnik të vendit. Kjo situatë ka nxitur thirrje për kthim të vëmendjes tek barazia, përfaqësimi dhe respektimi i marrëveshjeve ndëretnike – si një nga shtyllat kryesore për stabilitetin dhe integrimin evropian të Maqedonisë së Veriut.
Ajo që ka habitur më shumë është heshtja e plotë nga zëvendësministri i Bujqësisë, Albrim Hoxha, i cili deri më tani nuk ka dhënë asnjë prononcim publik, sqarim apo qëndrim për këtë përjashtim të qartë të shqiptarëve nga strukturat drejtuese në dikasterin ku ai mban post drejtues.