Premtimet e bujshme të grupimit VLEN dhe të qeverisë për ndalimin e plotë të lojërave të fatit online duket se nuk kanë pasur kurrë mbështetje reale. Edhe pse u tha se ato do të ndaloheshin 100% brenda vitit të parë të qeverisjes, realiteti është krejt tjetër: jo vetëm që nuk janë ndaluar, por me projektligjin e ri për Lojërat e Fatit po përgatitet legalizimi dhe garantimi i funksionimit të tyre.
Ky projektligj, që po përgatitet nga Ministria e Financave dhe është mbështetur nga VMRO-DPMNE dhe VLEN, parasheh që licencat për lojërat e fatit online të jepen për një periudhë 6-vjeçare, njësoj si në të kaluarën. Kjo tregon qartë mungesën e vullnetit politik për ndalimin e këtij fenomeni që prek qindra familje dhe komunitete.
Jo vetëm kaq, por ligji i ri nuk përmban masa të forta mbrojtëse për qytetarët. Sipas dokumenteve të paraqitura:
Nuk ka mekanizma të pavarur ankimi për vendimet e autoriteteve;
Nuk përcaktohet një afat i qartë për shqyrtimin e aplikimeve për licencë;
Lejohet revokimi arbitrar i licencave pa të drejtë rishqyrtimi të drejtë;
Nuk ka mekanizma efektivë për verifikimin e moshës apo përjashtimin e personave me varësi të diagnostikuar nga lojërat e fatit.
Për më tepër, projektligji nuk ofron garanci për mbrojtjen e të dhënave personale: mungon një afat i qartë për ruajtjen e tyre, nuk garantohet e drejta për fshirje apo transferim të të dhënave, dhe as ndalimi i ndarjes së tyre me palë të treta.
Në vend të ndalimit të premtuar, po krijohet një sistem që synon të monopolizojë tregun, duke favorizuar kompani të lidhura me pushtetin aktual – në shumë raste të dyshuara si në pronësi të fshehur të njerëzve të afërt me qeveritarët.
Kjo është “dhurata” që VLEN i ka ofruar shqiptarëve: jo ndalim të lojërave të fatit online, por një formë e re legalizimi që, në vend të mbrojë qytetarët, i ekspozon edhe më shumë ndaj pasojave sociale dhe ekonomike të tyre.