Pas fyerjeve të paprecedentë të funksionarit të VLEN-it, Latif Arifi, ndaj ambasadorit të Republikës së Shqipërisë në Maqedoninë e Veriut, Denion Mejdani, ka ardhur një reagim i fortë dhe i drejtpërdrejtë nga gazetari dhe opinionisti Mislimi.
Në një status publik që po qarkullon gjerësisht në rrjetet sociale, Isimi ka denoncuar gjuhën denigruese të përdorur nga Arifi dhe e ka cilësuar atë si shërbim të pastër ndaj agjendës së VMRO-së, në dëm të interesit kombëtar shqiptar.
“Ju mendoni se jeni në kohën e diktaturës sllave ku shqiptarët nuk guxonin të mbanin shqiponjën në bluzat e tyre, madje as të përmendnin në shkolla si një shpend që fluturon dhe i ha sorrat?”, shkruan Isimi me tone të ashpra, duke shtuar se për të kënaqur lidershipin e Hristijan Mickoskit, funksionarët e VLEN-it janë gati të flijojnë gjithçka shqiptare.
Në reagimin e tij, gazetari akuzon drejtpërdrejt Arifin dhe eksponentët e VLEN-it se, për interesa të ngushta politike, po tentojnë të “presin krahët e shqiponjës”, duke e kthyer këtë simbol të shenjtë të identitetit kombëtar në objekt sulmi politik dhe propagandistik.
“Sonte të gjithë shqiptarët janë me shqiponjën që fluturon, me Ambsadorin, ndërsa vetëm ju, funksionarët e VLEN-it, jeni me VMRO-në. Ju ua keni ulur dinjitetin shqiptarëve, por shqiponjën nuk do mundeni ta ulni kurrë!”
Fyerjet ndaj ambasadorit Mejdani, pas falënderimeve që ai mori nga banorët e Krushevës dhe Nerovës për ndihmën në zgjidhjen e çështjes së shkollës shqipe në këtë zonë, kanë shkaktuar zemërim të gjerë publik dhe reagime të shumta. Ky është rasti i dytë që ambasadori sulmohet nga përfaqësues të këtij koalicioni, pas deklaratave të mëparshme gjatë krizës qeveritare.
Gazetari Isimi mbyll reagimin e tij me një thirrje të fortë publike: “Harrone këtë sot e 1000 vjet. Shqiponja do të fluturojë edhe më lartë.”