Ambasadori i Shqipërisë në Maqedoninë e Veriut, Denion Meidani, është bërë sërish shënjestër e fyerjeve dhe sulmeve publike nga eksponentë dhe përkrahës të koalicionit VLEN, vetëm pak ditë pasi u falënderua publikisht nga banorët e Krushevës dhe Nerovës për ndihmën që dha në zgjidhjen e çështjes së shkollës shqipe në fshatin Nerovë.
Në vend të vlerësimit institucional për një kontribut që synon përmirësimin e kushteve të arsimit shqip, ambasadori Meidani u përball me një valë reagimesh denigruese. Ndër to, spikati komenti i deputetes Imeri Stafa, e cila jo vetëm që hodhi poshtë rolin e ambasadorit, por u shfaq duke miratuar publikisht edhe ofendimet e rënda të anëtarëve të tjerë të koalicionit të saj ndaj përfaqësuesit të shtetit shqiptar.
“Shkolla në Nerovë u legalizua nga Qeveria VLEN. Nuk e di çfarë kontributi ka dhënë ambasadori Mejdani që po gllabëron meritat?! Ku ishit deri tani?”, shkroi deputetja në një koment që u pasua me “pëlqime” ndaj fyerjeve të tjera të artikuluara ndaj ambasadorit.
Sulmet ndaj Meidanit nuk janë të parat. Ai ishte vënë në shënjestër edhe më herët, kur doli publikisht në mbështetje të stabilitetit institucional pas largimit të Arben Taravarit nga Qeveria, gjë që nxiti reagime të ashpra nga të njëjtat struktura.
Kjo fushatë e përsëritur sulmesh ndaj një përfaqësuesi zyrtar të Republikës së Shqipërisë është cilësuar nga shumë analistë dhe qytetarë si një precedent i paprecedentë dhe i dëmshëm për marrëdhëniet shqiptaro-shqiptare në rajon. Veprimet e tilla jo vetëm që shkelin normat e etikës politike dhe të komunikimit publik, por minojnë edhe frymën e bashkëpunimit institucional ndërmjet dy vendeve.
Ndërkohë, shumë aktivistë dhe qytetarë, përfshirë edhe zëra nga BDI, kanë dalë në mbështetje të ambasadorit Mejdani, duke e vlerësuar si një figurë të përkushtuar dhe të palodhur në çështjet që prekin komunitetin shqiptar në Maqedoninë e Veriut.
Me ironi dhe qetësi, ambasadori Mejdani i është përgjigjur të gjithë kësaj me vetëm tre fjalë: “Ju dua shumë.”
Një përgjigje që thekson diferencën mes etikës diplomatike dhe gjuhës së urrejtjes që, fatkeqësisht, po normalizohet nga segmente që pretendojnë të përfaqësojnë shqiptarët.