Një zhvillim i ri politik ka ndodhur në komunën e Vrapçishtit, ku Isen Shabani ka hapur zyrtarisht shtabin për rikandidimin e tij si kryetar komune. Ngjarja do të mbahet nesër në fshatin Negotin, me pjesëmarrjen e Arben Taravarit, liderit të njërës prej dy krahëve të ndarë të Aleancës për Shqiptarët.
Shabani, i cili disa muaj më parë u largua nga Fronti Europian dhe iu bashkua krahut të Taravarit në Aleancë, pati akuza të forta ndaj ish-partnerëve të tij politikë, duke i cilësuar si joefikasë dhe të paorganizuar. Ai atëherë theksonte se funksionaliteti dhe vizioni i vërtetë gjendeshin tek VLEN , aty ku bënte pjes edhe Taravari, i cili aso kohe ishte pjesë e koalicionit VLEN.
Ironikisht, vetë Taravari më vonë braktisi koalicionin VLEN, ndërsa tani po e mbështet Shabanin në rikandidimin e tij – por jashtë strukturës së Frontit Europian, të cilin vetë Shabani e kishte kritikuar dhe braktisur.
Situata bëhet më e ndërlikuar pasi Vrapçishti mbetet një komunë me peshë të veçantë politike, dhe është gjithashtu e pretenduar nga një tjetër figurë e rëndësishme brenda Frontit Europian, Ziadin Sela. Kjo shton tensionet për garën zgjedhore në këtë komunë, ku duket se do të përballen jo vetëm parti të ndryshme, por edhe krahë të ndryshëm brenda të njëjtave struktura politike.
A do të garojë Isen Shabani vetëm si kandidat i krahut të Taravarit në Aleancën për Shqiptarët? Dhe kush do të jetë kandidati i Frontit Europian për Vrapçishtin? Këto pyetje mbeten ende pa përgjigje, ndërsa terreni politik në komunë po nxehet dita-ditës.