Turqia ka reaguar ashpër ndaj sulmeve të fundit izraelite kundër Iranit, duke i cilësuar ato si një provokim të rrezikshëm dhe shkelje të hapur të së drejtës ndërkombëtare.
“Nga mëngjesi i sotëm, Izraeli e ka çuar strategjinë e tij për të zhytur rajonin tonë në gjak, lot dhe destabilitet në një fazë jashtëzakonisht të rrezikshme,” thuhet në deklaratën zyrtare.
Autoritetet turke e akuzuan qeverinë e kryeministrit izraelit Benjamin Netanyahu për veprime agresive dhe pa ligj që synojnë të përhapin kaos në të gjithë rajonin dhe më gjerë, në një kohë kur bisedimet për programin bërthamor të Iranit janë intensifikuar dhe presioni ndërkombëtar mbi ofensivën në Gaza po rritet.
“Administrata e Netanyahut po përpiqet të infektojë rajonin dhe botën me papërgjegjshmëri dhe brutalitet. Komuniteti ndërkombëtar duhet t’i japë fund kësaj banditizmi izraelit që kërcënon paqen globale dhe rajonale,” vijon më tej deklarata.
Turqia theksoi se sulmet nga rrjeti i atentateve i udhëhequr nga Netanyahu “kanë vënë në zjarr të gjithë rajonin” dhe bëri thirrje për parandalimin e menjëhershëm të përshkallëzimit të mëtejshëm.
“Ne shprehim edhe një herë se nuk dëshirojmë të shohim më gjakderdhje, shkatërrim dhe konflikte në Lindjen e Mesme.”
Në përfundim, Turqia shprehu solidaritetin e saj me Iranin: “Si vend fqinj, ne dënojmë fuqishëm këto sulme tinëzare ndaj Iranit. Urojmë mëshirën e Allahut për ata që humbën jetën, shërim të shpejtë për të plagosurit dhe ngushëllime për popullin vëlla iranian.”