Burime për in7 bëjnë të ditur se është marrë tashmë vendimi që zëvendëskryeministri Izet Mexhiti do të kandidojë për kryetar të Komunës së Çairit në zgjedhjet e ardhshme lokale. Kjo lëvizje shihet si një hap strategjik dhe një risk i lartë politik – një veprim i tipit “ALL IN” (gjithçka ose asgjë) nga ana e LD-së.
Sipas burimeve të afërta me zhvillimet partiake, vendimi për kandidimin e Mexhitit është ndikuar edhe nga tensionet e fundit politike dhe akuzat e ngritura nga kryetarja e Shkupit, Danella Arsovska, e cila pretendon se ish-kryetari i Çairit, Visar Ganiu, ka qenë i përfshirë në një skandal që përfshin rreth 150 raste të dyshuara për falsifikime në procesin e legalizimeve. Këto akuza kanë krijuar një klimë pasigurie dhe presioni të brendshëm në parti, duke e bërë të nevojshëm një emër të fuqishëm dhe me përvojë për të rikthyer besimin e elektoratit.
Zgjedhja e Mexhitit shihet gjithashtu si një kompromis i brendshëm brenda radhëve të LD-së, ku disa figura me ndikim pretendonin të jenë kandidatë për drejtimin e kësaj komune me rëndësi të madhe politike dhe simbolike për shqiptarët në Maqedoninë e Veriut. Me një karrierë të gjatë politike dhe një profil të njohur publik, Mexhiti pritet të konsolidojë bazën elektorale dhe të sjellë një garë të fortë, por gjithashtu të rrezikshme nëse kalkulimet politike nuk përputhen me pritjet e qytetarëve.
Në javët në vijim pritet që VLEN të zyrtarizojë këtë kandidaturë dhe të nisë fushatën për rikthimin e kontrollit në një nga bastionet më tradicionale të saj.