Reagon krahu i Selës ndaj Taravarit: “Ziadin Sela ka burrëri dhe nuk shet komunat shqiptare VMRO-së”
Pas deklaratës ironike të Arben Taravarit në emisionin “Politiko” në Kanal 10, ku tha se “me VLEN morëm 14 deputetë, po të vinte edhe Sela do të merrnim 15”, ka reaguar ashpër krahu i ish-kryetarit të Aleancës për Shqiptarët, Ziadin Sela.
Në një reagim të shpërndarë nga zëdhënësi i këtij grupimi, Sela përshkruhet si një politikan me parime të forta, ideal, kauzë dhe qëndrueshmëri, duke u distancuar hapur nga lëvizjet politike të Taravarit dhe bashkëpunimi i tij me VMRO-DPMNE-në.
“Ziadin Sela ka parime, ka ideal, ka kauzë, ka besë, ka qëndrim, ka kozistencë, ka burrëri, ka kurriz!”, thuhet në reagim.
Duke goditur drejtpërdrejt veprimet e Taravarit, deklarata vijon:
“Po, Ziadin Sela ka një EGO: nuk bën ‘akrobacione’, nuk përkulet, nuk shet, nuk tradhëton, nuk ngul thika pas shpine, nuk i serviloset VMRO-së, nuk tradhëton miqtë e as partnerët kur jep fjalë, nuk shet komunat shqiptare VMRO-së.”
Ky reagim shihet si një përplasje e hapur mes dy krahëve të ndarë të Aleancës për Shqiptarët, duke thelluar më tej hendekun mes tyre dhe duke e vendosur në pikëpyetje mundësinë e një bashkimi të afërt politik, ndonëse thirrjet publike për unitet po shtohen.