I ftuar në emisionin “Politiko” në televizionin Kanal 10, ish-ministri i Shëndetësisë dhe një nga figurat kryesore të koalicionit opozitar shqiptar VLEN, z. Arben Taravari, bëri thirrje për bashkim mes forcave politike shqiptare në Maqedoninë e Veriut.
Taravari deklaroi se nuk ka ofenduar ish-bashkëpartiakët e tij që nga momenti i ndarjes, duke theksuar se bashkëpunimi është i domosdoshëm për të përfaqësuar më mirë interesat e shqiptarëve në vend.
I pyetur nga gazetari nëse i detyronte një ndjesë ish-kryetarit të tij Ziadin Sela, për faktin që ky i fundit kishte refuzuar të bashkëpunonte me VLEN për të njëjtat arsye që tashmë Taravari po akuzon qeverinë aktuale – për diskriminim ndaj shqiptarëve – Taravari zgjodhi të ironizojë me një përgjigje politike.
“Para një viti ishte e domosdoshme një ndryshim politik. Ziadin Sela vetë më pati thënë se VLEN nuk do të marrë më shumë se 12 deputetë. Ne morëm 14, dhe nëse do na ishte bashkuar edhe ai, ndoshta do të kishim 15”, u shpreh Taravari me një dozë ironie ndaj peshës politike të Selës.
Kjo deklaratë vjen në një kohë kur tensionet dhe ndarjet brenda kampit politik shqiptar në Maqedoninë e Veriut mbeten të theksuara, ndërsa thirrjet për unitet politik mbeten një sfidë ende e parealizuar.