Shkup, 10 qershor – Kryetari i BDI Ali Ahmeti bashkë me nënkryetarin Osmani dhe sekretarin e përgjithshëm, Faton Ahmeti, morën pjesë në pritjen e organizuar nga Ambasada Britanike në Shkup me rastin e ditëlindjes së Mbretit Charles III.
Në një postim publik, Osmani theksoi rëndësinë e veçantë të marrëdhënieve ndërmjet Mbretërisë së Bashkuar dhe Maqedonisë së Veriut, duke vlerësuar kontributin britanik si një nga garantuesit kryesorë të Marrëveshjes së Ohrit – dokumentit kyç që vendosi themelet për paqen dhe bashkëjetesën ndëretnike në vend.
“Mbretëria e Bashkuar ka qenë gjithmonë një ndër mbështetëset më të rëndësishme të Maqedonisë së Veriut, jo vetëm në rrugën tonë euroatlantike, por edhe si një nga garantuesit kryesorë të Marrëveshjes Paqësore të Ohrit,” shkruan Osmani.
Ai kujtoi gjithashtu se marrëveshja e parë ndërkombëtare që Britania nënshkroi pas daljes nga BE-ja ishte pikërisht me Maqedoninë e Veriut.
“Jam veçanërisht krenar që marrëveshja e parë ndërkombëtare që Mbretëria e Bashkuar nënshkroi pas Brexit-it ishte pikërisht me Maqedoninë e Veriut – një Marrëveshje për Partneritet, Tregti dhe Bashkëpunim – dhe pata nderin të jem një nga nënshkruesit e saj,” theksoi Osmani.
Pjesëmarrja në këtë pritje diplomatike vjen në një moment kur stabiliteti dhe përfaqësimi ndëretnik janë sërish në fokusin e opinionit publik në vend, duke i dhënë simbolikë të veçantë mesazheve që dolën nga kjo ngjarje.