Shqipëria nuk shkoi më shumë se një barazim 1-1 në transfertë ndaj Letonisë, në sfidën e vlefshme për kualifikueset e Botërorit. Edhe pse kuqezinjtë dhanë gjithçka në pjesën e dytë, rezultati nuk ndryshoi dhe tashmë rruga drejt kualifikimit bëhet më e vështirë për skuadrën e drejtuar nga Silvinjo.
Letonët e nisën më mirë takimin dhe në minutën e 21-të kishin shansin e artë për të kaluar në avantazh, por portieri Thomas Strakosha priti me klas penalltinë e Ilaunieks, duke mbajtur të paprekur rrjetën e tij.
Reagimi i kuqezinjve ishte i menjëhershëm. Vetëm tetë minuta më pas, një aksion i ndërtuar mirë solli një autogol nga Cernomordijs, duke i dhënë avantazhin Shqipërisë. Por, në fundin e pjesës së parë, i njëjti lojtar përmirësoi gabimin duke barazuar shifrat në 1-1.
Në pjesën e dytë, Shqipëria ushtroi presion të vazhdueshëm dhe provoi në disa raste të ndryshojë fatin e ndeshjes, por pa sukses. Me këtë barazim, Shqipëria mban vendin e dytë në grup me 5 pikë, një më shumë se Serbia dhe katër më pak se Anglia kryesuese.
Rastet dhe golat
Min 45+4 – Letonia barazon rezultatin me Antonijs Cernomordijs që përfiton nga përgjumja e kombëtares sonë, duke shënuar me një goditje të saktë me kokë.
Min 28 GOL – Arbër Hoxha hedh një krosim të rrezikshëm në zonë dhe topi devijohet nga mbrojtësi Cernomordijs, duke përfunduar në rrjetë. Një autogol që i jep epërsinë kuqezinjve në përballjen ndaj Letonisë. Uefa e ka vlerësuar si devijim në fund nga Manaj.
Min 21 – Në një moment vendimtar të ndeshjes mes Shqipërisë dhe Letonisë, portieri i kombëtares kuqezi, Thomas Strakosha, bëri një ndërhyrje spektakolare duke pritur një penallti të goditur nga lojtari letonez Janis Ikaunieks në minutën e 21-të.
Ikaunieks mori përgjegjësinë për të ekzekutuar 11-metërshin, por Strakosha u hodh në drejtimin e duhur dhe ndaloi topin, duke ruajtur rezultatin e paprekur për Shqipërinë dhe duke ndezur entuziazmin në tribunat kuq e zi.