Deputeti i Aleancës për Ardhmërinë e Kosovës (AAK), Daut Haradinaj tha se edhe zgjedhjet janë zgjidhje. Kështu u shpreh ai, derisa u pyet nëse janë pro që vendi të shkojë në zgjedhje bashkërisht në datën e zgjedhjeve lokale.
Pas dështimit të 26-të të konstituimit të Kuvendit, Haradinaj tha se i takon lidershipit politik që të vendosë për të dalë nga kjo situatë.
“Nëse do të ishte zgjidhje kjo pse jo, por megjithatë është e paarsyeshme në këto rrethana për një emër konkret që vendi të shkojë në zgjedhje përsëri. Por, sido që të jetë, ne jemi të gatshëm të shkojmë në zgjedhje, pse jo, mendoj se edhe ajo është zgjidhje, unë kam thënë në ditën e parë se edhe zgjedhjet janë zgjidhje”, tha ai.
Deputetja e Lëvizjes Vetëvendosje, Albulena Haxhiu tha se nuk përjashtohet situata ku mund të mbahen dy palë zgjedhje në të njëjtën kohë. Ajo tha se nuk janë kundër si Lëvizje Vetëvendosje, por sipas saj nëse nuk arrihet konstituimi i Kuvendit, atëherë kjo është e vetmja zgjidhje.
Presidentja e vendit, Vjosa Osmani sot do të takojë subjektet politike për të diskutuar lidhur me datën për mbajtjen e zgjedhjeve lokale.