Buxheti i M-NAV-it i dëmtuar për gati 1.5 milionë denarë: Kallëzim penal ndaj ish-drejtorit dhe shefes së prokurimeve publike
Personi i parë i kallëzuar, V.K., e ka keqpërdorur pozitën dhe autorizimet zyrtare duke bashkuar dy prokurime publike krejtësisht të ndryshme dhe të papajtueshme në një të vetme — konkretisht, një prokurim për zhvillimin e një zgjidhjeje të plotë operative për menaxhimin e dokumenteve (zgjidhje softuerike) me një prokurim tjetër për arkivimin fizik dhe elektronik të dokumenteve.
Administrata për Policinë Financiare ka paraqitur kallëzime penale në Prokurorinë Themelore Publike Shkup kundër ish-drejtorit ekzekutiv të M-NAV SHA Shkup, për shkak të bashkimit të dy prokurimeve të papajtueshme publike në një të vetme, si dhe kundër B.A., në cilësinë e ushtrueses së detyrës së udhëheqëses së sektorit për prokurime publike, për dyshime se ka dështuar të kryejë mbikëqyrjen e nevojshme. Me këtë veprim, të kallëzuarit e kanë dëmtuar buxhetin e M-NAV SHA Shkup për shumën prej 1.493.433 denarë.
– Administrata për Policinë Financiare ka paraqitur kallëzim penal kundër V.K., në cilësinë e ish-drejtorit ekzekutiv të Sektorit për Teknikë të Aviacionit në Shoqërinë Aksionare në pronësi shtetërore për ofrimin e shërbimeve të navigimit ajror – M-NAV SHA Shkup, për bazë dyshimi për kryerjen e veprës penale “Keqpërdorim i pozitës dhe autorizimit zyrtar”, neni 353 paragrafi 2 i Kodit Penal, si dhe kundër B.A., në cilësinë e ushtrueses së detyrës së udhëheqëses së sektorit për prokurime publike në të njëjtën shoqëri aksionare, për bazë dyshimi për kryerjen e veprës penale “Punë e pandërgjegjshme në shërbim”, neni 353-v paragrafi 2 i Kodit Penal, thonë nga Administrata për Policinë Financiare.