Ministria e Jashtme turke tha të hënën në mëngjes se Turqia dënon operacionet e zgjeruara tokësore të Izraelit në Gaza, duke bërë thirrje për ndërprerjen e menjëhershme të sulmeve dhe shpërndarjen urgjente të ndihmës humanitare.
“Në një kohë kur negociatat janë duke vazhduar, zgjerimi i sulmeve të Izraelit në Gaza dobëson të gjitha përpjekjet për të vendosur paqe dhe stabilitet”, tha ministria në një deklaratë me shkrim.
Ai shtoi se ky përshkallëzim “tregon edhe një herë se Izraeli nuk ka ndërmend të arrijë një paqe të qëndrueshme”.
Ankaraja përsëriti thirrjen e saj për “një armëpushim të menjëhershëm, ndërprerjen e operacioneve në pjesë të ndryshme të Gazës dhe hyrjen e papenguar të ndihmës humanitare”.
Gjithashtu, ajo i bëri thirrje bashkësisë ndërkombëtare të ndërmarrë “hapa efektivë dhe të vendosur kundër Izraelit”, në përputhje me detyrimet e tyre ligjore dhe humanitare.
“Vendosja e paqes dhe sigurisë rajonale kërkon që bashkësia ndërkombëtare të veprojë pa vonesë”, theksoi ministria.
Ushtria izraelite njoftoi se kishte nisur sulme tokësore në Gaza që synonin zgjerimin dhe bërjen e pushtimit të përhershëm, si pjesë e një plani të ri ofensiv të miratuar nga kabineti i sigurisë më 4 maj.
Ushtria izraelite ka ndërmarrë një ofensivë brutale kundër Gazës që nga tetori i vitit 2023, duke vrarë më shumë se 53,000 palestinezë, shumica prej tyre gra dhe fëmijë.
Gjykata Ndërkombëtare Penale lëshoi urdhër-arreste nëntorin e kaluar për kryeministrin izraelit Benjamin Netanyahu dhe ish-ministrin e tij të Mbrojtjes Yoav Gallant për krime lufte dhe krime kundër njerëzimit në Gaza.
Izraeli përballet gjithashtu me një padi për gjenocid në Gjykatën Ndërkombëtare të Drejtësisë për luftën e tij në enklavë./ AA.