Deputeti Halil Snopçe ka reaguar me një deklaratë të fortë në rrjetet sociale, duke analizuar zhvillimet e fundit në skenën politike shqiptare në Maqedoninë e Veriut përmes një qasjeje logjike dhe faktike.
“Si matematikan që jam,” – shkruan Snopçe – “para çdo konkluzioni politik, kam shprehi të konstatoj faktet. Fatkeqësisht, tek ne mungon tradita e konstatimit të fakteve, pa të cilat çdo përfundim politik është i pabazuar.”
Ai shpalos dy fakte që i cilëson si të pamohueshme:
Sipas tij, përderisa Aleanca për Shqiptarët ishte në opozitë, nuk pati kurrë një bashkim të plotë të opozitës shqiptare për të mposhtur BDI-në. Madje, disa parti bashkëpunuan me LSDM-në. Vetëm pasi Aleanca hyri në qeveri, u krijua bashkimi i partive të tjera në formën e LEN-it.
Ndërkohë që Aleanca ishte pjesë e koalicionit VLEN, nuk kishte asnjë iniciativë për të formuar një parti të përbashkët, ndonëse kjo ishte marrëveshja. Por sapo Aleanca vendosi të dalë e vetme me lista këshilltarësh, tre partitë e tjera vendosën menjëherë të bashkohen në një parti.
Snopçe, duke përdorur parimin e silogjizmit logjik nga matematika, thotë se këto dy fakte çojnë në një përfundim të qartë: “Problemi për këto parti nuk është BDI-ja, por Aleanca për Shqiptarët.”
Ai e përmbyll me një pyetje retorike: “A është koincidencë apo jo? Secili le të gjykojë vetë.”
Deklarata e Snopçes vjen në një kohë kur skena politike shqiptare po përjeton lëvizje të reja dhe riformatime në prag të zhvillimeve të rëndësishme zgjedhore.