Punonjës të disa institucioneve kanë mbetur ende pa paga. Ndër ta janë edhe rreth 50 të punësuar në Kopshtin Zoologjik. Mile Tanovski kryetar i sindikatës së të punësuarve në kopshtin Zoologjik u bëri apel të gjithë personave kompetent në këtë rast ta kryejnë punën e tyre sa më shpejtë në mënyrë që të mos detyrohen të bëjnë greva më të mëdha. Ai tha se që nga muaji mars të punësuar nuk kanë marrë paga, ndërsa që nga dita e djeshme kanë humbur edhe sigurimin shëndetësor. Në mbështetje të tyre doli edhe kryetari i SASHK Jakmi Nedellkovski i cili tha se atë që e vuajtën të punësuarit në kulturë tani po e vuajnë edhe të punësuarit në kopshtin zoologjik.
“Këtë protestë nuk e bëjmë kundër askujt, nuk është kundër kulturës as kundër qytetit të Shkupit siç kishte spekulime në disa mediume, kjo protestë është që të na shohin se ne nuk kemi marra paga që nga muaji marsi, pagën e fundit e kemi marrë para 45 ditëve. Neve na duhen paratë pasi që nga dje kemi humbur edhe sigurimin shëndetësor për shkak të mos marrjes së pagave në kohë”, deklaroi Mile Tanovski, kryetar i sindikatës së të punësuarve në Kopshtin Zoologjik.
“Nëse sot njerëzit dolën publikisht ta tregojnë brengën e tyre, nga nesër nëse urgjentisht nuk paguhet paga e tyre me shumë mundësi dyert e kopshtit zoologjik do të jenë të mbyllura. Kështu që i gjithë opinioni do të informohet, për fat të keq kjo bukuri që ndodhet para meje do të jetë e mbyllur për vizitorët”, tha Jakim Nedellkovski kryetari i SASHK. /Alsat.mk