Ish-deputetja e Kuvendit të Kosovës, Besa Ismaili, ka reaguar për situatën e fundit politike në vend.
Në një postim në “Facebook” me titull: “Kur shumica e ka dobësinë më të madhe pas fshehtësisë”, Ismaili ka theksuar se kur një shumicë politike kërkon votim të fshehtë, në dukje kërkon liri për ndërgjegje dhe ndoshta ndonjë votë ‘hua’.
“Por kur këtë e bën Lëvizja Vetëvendosje!, është më tepër një akt simbolik, një vegël taktike për të thelluar krizën dhe blerë kohën. Në realitet, LVV është më se vetëdijshme që në votimin e fshehtë nuk do ti dilnin as numrat e vet, e lëre më “të huazojë” ndonjë nga opozita”.
“Jam e bindur, siç mund të jetë edhe znj. Haxhiu e bindur, që mbase as gjysma e grupit parlamentar të LVV-së nuk do ta votonte atë për kryetare të Kuvendit, për shumë arsye të njohura publikisht”, ka shkruar Ismaili.
Ajo ka thënë se votimi i fshehtë nuk është shpëtim për një shumicë manipulative. “Votimi i fshehtë për ta është pasqyrë që ua kthen të vërtetën. Ajo është edhe më e dobët pas votimit të fshehtë”, ka shkruar ish-deputetja Ismaili.