Dje vredistët e “Severnës” në mbledhjen e fundit mes tyre i shkrinë subjektet politike në një parti, ku sot e tutje do të ketë vetëm një parti dhe ajo është VREDI.
Nga mbledhja ata dolën të kënaqur duke thënë se tashmë jemi një subjekt dhe se në ditët në vijim pritet ngritja e strukturave të përbashkëta.
Kryesia është zgjedhur por nuk ka akoma një kryetar, por siç thanë ata për të do të vendosin në ditët në vijim.
Njëri nga eksponentët e VREDI-t siç është z.Kasami, para mediave u shpreh se:
“Unë e përmenda, se në mbledhjet e radhës, në ditët në vijim do të flasim edhe për organet e tjera duke përfshirë këtu edhe lidershipin e partisë. Ajo që është me rëndësi që nga sot nisim homogjenizimin dhe ngritjen e strukturave të përbashkëta atë që e kemi paralajmëruar – themelimin e një subjekti të vetëm politik”.
Cilido që të zgjidhet lider i partisë së re me apetite të vjetra për pushtet, shqiptarët nuk do të kenë asnjë leverdi nga VREDI i vjetër dhe i ri në qeverinë e despotit Micko, pasi ata nuk patën këllqe që me dinjitet të kërkonin ndryshimet e premtuara, por u qurravitën dhe u jargosën për 10 muaj para Mickos me kërkesa mjerane për ta sjellë ndryshimin e premtuar para shqiptarëve, edhe pse ishin zotuar se ndryshimet kushtetuese do të ndodhin pas 6 muajve të qëndrimit të tyre në qeverinë e koalicionit.
Për kryekomitin Micko vredistët janë numra të pa dobishëm që paraqesin vetëm fasadë kozmetike para ndërkombëtarëve, sesi pakicat në “državën Severna” (në këtë rast vredistët) kanë treguar lojalitet ndaj pushtetit dhe jo si forcë politike me dinjitet para shqiptarëve.
Përkundrazi, në vend të ndryshimit të premtuar vredistët kanë treguar momente dobësie dhe nënshtrimi, vasalitetit dhe qyqarllëku para supremacisë së pushtetit maqedon.
Përballë pabarazisë etnike dhe njollosjes së identitetit gjuhësor të shqiptarëve në kushtetutë si nofka e 20%, vredistët dështuan para shqiptarëve kur premtuan se ajo do të shlyhej pas 6 muajve me pjesëmarrjen e tyre në qeverinë e koalicionit, megjithatë ndryshimi nuk ndodhi!
Ndryshimi nuk ndodhi dhe as ka për të ndodhur me këta qeramanë të kampit shqiptar që po dëshmohen çdo ditë e më shumë si vasalët të bindur të despotit Micko, që nuk i bën llogari si subjekt politik, por i mban në pallatin e bardhë si marioneta që kapërdisen korridoreve të saj si idiotë të padobishëm që i duhen veçse për kozmetikë para ndërkombëtarëve.
Medai Shaholli