Përfaqësuesi i Aleancës për Shqiptarët, Halil Snopçe, në një deklaratë për televizionin Sitel, nuk e përjashtoi mundësinë e bashkëpunimit me Bashkimin Demokratik për Integrim (BDI), duke theksuar se çdo vendim do të merret në bazë të interesave të partisë.
“Jemi të hapur për bashkëpunim me cilëndo forcë politike, përfshirë edhe BDI-në, nëse një gjë e tillë është në interes të partisë,” u shpreh Snopçe.
Kjo deklaratë vjen në një periudhë të ndjeshme paszgjedhore, ku formimi i shumicës parlamentare dhe negociatat për koalicione janë në qendër të vëmendjes. Aleanca për Shqiptarët, e udhëhequr nga Arben Taravari, ka qenë kritike ndaj BDI-së në të kaluarën, por sinjalet për një qasje pragmatike tregojnë një qëndrim më fleksibël në funksion të zhvillimeve politike të fundit.
Megjithatë, Snopçe nuk dha detaje konkrete mbi ndonjë kontakt ose marrëveshje të mundshme, duke lënë hapësirë për interpretime në lidhje me drejtimin që mund të marrë partia në ditët në vijim.