Pas shkrimeve tendencioze në disa media në lidhje me ndërtimet e reja dhe ndryshimet që po pëson plani detal urbanistik në Tetovë, ka reaguar Rilind Selmani, drejtori i Urbanizmit në Komunën e Tetovës. Përmes një postimi publik, ai ka hedhur poshtë akuzat dhe ka theksuar se komuna po punon intensivisht për zhvillimin e qëndrueshëm të qytetit.
“Tetova po zhvillohet – prandaj po sulmohet”, thekson Selmani në reagimin e tij, duke akuzuar kundërshtarët politikë për përhapje dezinformatash. Ai shton se ata që për vite të tëra e kanë bllokuar zhvillimin e Tetovës, sot nuk mund të përballojnë ndryshimet pozitive që po ndodhin në qytet.
Në deklaratën e tij, Selmani liston një sërë projektesh të realizuara dhe në proces, përfshirë:
-Finalizimin e 6 planeve detale urbanistike, me 10 të tjera në ministri dhe 15 në procedurë,
-Nisjen e punës për Planin Gjeneral Urbanistik, i paprekur që nga viti 2003,
-Përfshirjen e një rrjeti të ri të ujësjellësit dhe kanalizimit,
-Fitimin e një granti prej 40 milionë euro nga Banka Botërore për ndërtimin e kolektorit të qytetit,
-Mbi 2500 lëndë të përpunuara për shpronësime dhe 3000 raste legalizimi të zgjidhura,
-Vendosjen e sporteleve funksionale për urbanizëm, financa dhe shërbime të tjera komunale.
Sipas tij, këto investime janë pjesë e vizionit për një Tetovë të planifikuar dhe të zhvilluar, me më shumë se 30 rrugë të asfaltuara, 15 projekte të ujësjellësit dhe kanalizimit dhe mbi 15 milionë euro investime të planifikuara për vitin 2025.
“Qytetarët do të flasin qartë në ditën e zgjedhjeve – sepse kur punon me rezultat, s’ka kush guxon të të dalë përballë,” shkroi Selmani.