Policia turke arrestoi shtatë persona të premten nën dyshimin për shitjen e informacionit në shërbimin e inteligjencës izraelite Mossad, raporton Associated Press duke cituar agjencinë shtetërore të lajmeve Anadolu.
Të dyshuarit, të cilët dyshohet se i kaluan detajet Mossad-it përmes detektivëve privatë, u arrestuan në një operacion të përbashkët me Organizatën Kombëtare të Inteligjencës të Turqisë (MIT).
Duke vepruar sipas urdhrave të lëshuara nga zyra e kryeprokurorit publik të Stambollit, oficerët e policisë antiterror dhe degës së inteligjencës kryen bastisje në Stamboll dhe në qytetin e Izmirit në bregun perëndimor, raportoi Anadolu. Dy të dyshuar të tjerë në hetim mendohet se janë ndaluar më herët, transmeton Gazeta Express.
Pas arrestimeve të premten, Anadolu citoi një dokument të prokurorisë që thoshte se operacioni kishte në shënjestër “shtetasit palestinezë dhe familjet e tyre … brenda fushës së konfliktit të vazhdueshëm izraelito-palestinez”.
Muajin e kaluar, 34 persona u arrestuan nga policia turke me dyshimin se kishin spiunuar për Izraelin, raporton AP. Ata u akuzuan se planifikonin të kryenin aktivitete që përfshinin zbulimin dhe “ndjekjen, sulmin dhe rrëmbimin” e shtetasve të huaj që jetonin në Turqi.
Në atë kohë, ministri i drejtësisë Yilmaz Tunc tha se shumica e të dyshuarve akuzoheshin për “spiunazh politik ose ushtarak” në emër të inteligjencës izraelite.
Mossad thuhet se ka rekrutuar palestinezë dhe shtetas sirianë në Turqi si pjesë e një operacioni kundër të huajve që jetojnë në Turqi.