Në këtë ditë, tre vite më parë, në Bullgari ndodhi një aksident trafiku ku një autobus i “Besa Trans” mori flakë. 45 persona humbën jetën dhe shtatë u lënduan. Autobusi ishte pjesë e grupit prej katër autobusësh, të kompanisë Besa Trans që ktheheshin nga një udhëtim i organizuar në Stamboll. Pronari i “Besa Trans” Bekim Haxhiu është dënuar me një vit e tetë muaj burg për shkak se ka falsifikuar dokumentet që më pas i kanë përdorur shoferët kur kanë dalë jashtë vendit me autobusët. Me gjobë prej 800.000 denarë është gjobitur edhe kompania “Besa Trans” si person juridik dhe i është shqiptuar ndalesë për të marrë leje për transport rrugor në afat prej katër vitesh nga plotfuqishmëria e aktgjykimit. Në Bullgari për aksidentin ka pasur proces gjyqësor dhe faji u lokua te vozitësi, i cili gjithashtu ka ndërruar jetë. Sot, tre vjet më vonë, në vendin ku ndodhi aksidenti, nuk ka asnjë shenjë, pllakë apo gjë tjetër, se këtu ka ndodhur një tragjedi, përveç kurorave të thara nga përvjetori i mëparshëm.
Share