Tre burime i kanë thënë CNN-it se një juri federale në Shtetet e Bashkuara të Amerikës ka mbajtur mbledhje rregullisht përgjatë hetimeve të vazhdueshme në rastin e reperit P. Diddy, që akuzohet për krime seksuale.
Njëri nga burimet ka thënë se anëtarë të kësaj jurie të enjten kanë paraparë të dëgjojnë një dëshmitar i cili pretendon të ketë disa video, në të cilat shihen disa të famshëm si viktima të veprave të Combsit.
Avokatja Ariel Mitchell i ka thënë CNN-it se një nga klientët e saj është thirrur të dëshmojë para jurisë të enjten. Ky klient, i cili është burrë, nuk ka ngritur asnjë padi kundër Diddyt, emri i vërtetë i të cilit është Sean Combs, dhe nuk po pretendon se është viktimë e krimeve asnjërit nga krimet seksuale, të cilat pretendohet t’i ketë kryer Combs. Avokatja ka thënë se ai është dëshmitar që ka prova dhe informacion rreth akuzimeve për abuzime seksuale e krime të tjera që ka bërë Combs, në disa prej të cilave përfshihen të famshëm të tjerë.
“Ne jemi këtu që të zbatojmë urdhrin e gjykatës”, ka thënë Mitchell për CNN, duke mos e zbuluar identitetin e klientit të saj, të cilin as CNN nuk e ka publikuar deri më tash.
Mitchell përfaqëson edhe dy gra që e akuzojnë Combsin. Në njërën nga këto çështje, ajo ka kërkuar nga gjykata që të tërhiqet, me arsyetimin se klientja e saj ka veprime të dyshimta.
Përfaqësuesit e Combsit nuk i janë përgjigjur kërkesës së mediumit për të dhënë komente për dëshmitarin me të cilin po takohet juria.
Një tjetër burim, i cili është njohës i kësaj çështjeje, më parë pati thënë për CNN-in se akuzues e dëshmitarë vazhdimisht mbajnë takime me jurinë, që kur Combs është arrestuar.
“Juria gjithnjë po mban takime. Hetimet janë duke vazhduar”, ka thënë ky burim të mërkurën. Një burim tjetër, i cili po ashtu është i afërt me çështjen në fjalë, ka thënë se juria nuk po ndalet.
Lajmet për takimet e vazhdueshme që po bën juria federale, vijnë pasi autoritetet shtetërore, të mërkurën kanë deklaruar se kanë siguruar disa materiale, përfshirë video, audio-incizime e mesazhe nga më shumë se 60 pajisje e llogari që janë në emër të Combsit.
Në deklaratën e tyre, e cila përmban 49 faqe, autoritetet pretendojnë se materialet e radhës do të përfshijnë komunikime me dëshmitarë e viktima, incizime që kanë lidhje me festat e ashtuquajtura “të çmendura” si dhe të dhënat bankare ku tregohen pagesat ndaj viktimave.
Combs, të cilit vazhdimisht po i grumbullohen paditë për krime seksuale, aktualisht ndodhet në paraburgim në Brooklyn të New Yorkut dhe i ka mohuar të gjitha akuzat. Mbrojtja në liri i është mohuar tri herë, përfshirë dorëzaninë prej 50 milionë dollarësh.