Lidhja Socialdemokrate e Maqedonisë së Veriut ka reaguar ndaj rastit që ndodhi mbrëmë në Çair – ku pati gjuajtje me armë zjarri dhe si rrjedhoje është plagosur një person, transmeton TV21.
“Çdo mbrëmje në qytetet tona ka incidente të reja, gjuajtje, dhunë dhe kriminal. Mbrëmë në Çair në gjuajtje është lënduar djaloshi 19-vjeçar me katër plagë.
Kjo dëshmon paaftësinë e plotë të ministrit të Punëve të Brendshme, Toshkovski, dhe udhëheqësisë së VMRO-DPMNE-së. Rrugët janë shndërruar në Perëndim të Egër.
Pati gjuajtje në Çair, në Haraçinë, vrasje në Mavrovë, kurse para saj pati edhe në Hasanbeg, Batincë, Tetovë dhe në rrugën e Plastikave. Për të gjitha këto incidente kryerësit nuk janë gjetur, kurse nga 10 vrasje dhe tentativa për vrasje, Toshkovski arriti ta zbardhë mezi një rast”, thanë mes tjerash nga LSDM.