Partnerët e koalicionit qeveritar, kryeministri Hristijan Micksoki dhe kreu i ASH-së Arben Taravari i kundërpërgjigjen Frontit Europian të cilët një ditë më parë ftuan VLEN-in që ta lej Qeverinë dhe të rreshtohet me Frontin. Taravari tha se BDI dhe Ahmeti po mësohen në opozitë dhe se i duhet edhe pak kohë sa të adaptohen
“z.Ahmeti mendoj se dalë ngadalë po mësohet në opozitë, shpresoj se do të mësohet edhe më shumë dhe mendoj se duhet adaptim, asgjë më shumë”, tha Arben Taravari, Kryetar i ASH-së.
Micksoki nga ana tjetër tha se BDI po mësohet si parti opozitare dhe shpreh keqardhje që Ahmeti e krahasoi partinë e tij si gomë rezervë
“Prisja më shumë kreativitet, por kjo është ajo që është. I dëshiroj ditë opozitare ku do të reformohen , ta gjejnë identitetin e tyre programor, të reformohen me kuadër, ndoshta në ndonjë cikël zgjedhor do të paraqiten me qasje tjetër nga ajo që pamë në 20 vitet e kaluara, qasje e cila kishte për qëllim që sa më shumë të vidhet”, deklaroi Hristijan Mickoski, Kryeministër.
Duke komentuar paralajmërimet për protesta nga ana e BDI-së, Mickoski tha se protestat janë mjet demokratik dhe është zgjedhje e tyre. Ndërkohë kërkesën e Ahmetit për veting, Mickoski e cilësoi si satirë
“Mendoj se me shkuarjen e BDI-së në opozitë ai lloj i humorit dhe satirës ka përfunduar, por ato ja vazhdojnë edhe më tej, po në rregull, në periudhën që vjen do të dëgjojmë lloje të këtilla të humorit e satirës, ta shohim deri ku do të shkojnë si parti politike”, u shpreh Hristijan Mickoski, Kryeministër.
Fronti Evropian e quajti dështim 100 ditëshin e parë të Qeverisë. Ata thanë se nuk janë aspak të interesuar të jenë pjesë e kësaj qeveria për të legjitimuar politikat shtypëse dhe i bënë thirrje VLEN-it të rreshtohet në anën e tyre për t’i treguar vijat e kuqe Mickoskit.