Mesditen e sotme një 57-vjeçar ka mbetur i vrarë dhe një 15-vjeçar i plagosur si pasojë e një mosmarrëveshje me disa persona tjerë në fshatin Zllakuqan të Lipjanit. Të dy personat dyshohet se janë therur me thikë, ku si pasojë 57-vjeçari gjeti vdekjen. Rasti u konfirmua për Gazetën Online Reporteri.net nga zëdhënësja e policisë për rajonin e Prishtinës, Flora Ahmeti. Ajo bëri të ditur se dy të dyshuar për rastin tashmë veçse janë arrestuar nga Policia e Kosovës.
“Rreth orës 13:00, policia ka marrë informatën për një vrasje që ka ndodhë në fshatin Zllakuqan të Lipjanit. Menjëherë pas marrjes së informatës policia ka dalë në vendin e ngjarjes dhe ka ndërmarrë të gjitha veprimet e nevojshme që konsistojnë në hetimin e rrethanave që karakterizojnë ngjarjen. Bazuar në informacionet e para janë ngritur dyshimet se një mosmarrëveshje mes disa personave ka rezultuar me plagosjen e rëndë të dy personave, dyshohet me mjet të mprehtë thikë. Njëri nga personat e lënduar ka vdekur, ndërsa i lënduari tjetër është dërguar për tretman mjekësor. Vdekjen e viktimës mashkull, rreth 57 vjeç, e ka konstatuar ekipi mjekësor në QKMF në Magure”
“Aktualisht hetuesit policor në koordinim me prokurorinë, po ndërmarrin veprimet hetimore për për ndriçimin e plotë të rastit, ndërkohë që dy persona të dyshuar janë arrestuar”, tha Ahmeti. 15-vjeçari i plagosur është jashtë rrezikut për jetën. Kështu ka thënë për Gazetën Online Reporteri.net, Drejtori i Emergjencës Naser Syla. Ai ka bërë të ditur se ndaj 15-vjeçarit janë kryer të gjitha ekzaminimet e nevojshme, dhe është transferuar në Klinikën e Kirurgjisë Torakale për të vazhduar trajtimin, tha Syla./Reporteri.net.