Ministri i Shëndetësisë Arben Taravari ka dy shtëpi, një banesë, tokë ndërtimore, piktura artistike dhe stoli ari, sipas fletës së anketimit të tij të publikuar në faqen e Komisionit Shtetëror Kundër Korrupsionit. Siç shihet, ish-kryetari i komunës së Gostivarit, tani ministër i shëndetësisë, ka një shtëpi banimi në Gostivar prej 503 metrash katrorë në vlerë prej 43.050.000 (dyzet e tre milionë e pesëdhjetë mijë denarë) ose 705.737 euro, të cilën e ka marrë dhuratë në vitin 2023.
Taravari ka edhe një banesë në Karposh me sipërfaqe prej 94 metrash katrorë, në vlerë prej 5.771.600 denarë ose 94.616 euro. Apartamenti eshte blere ne vitin 2014. Pastaj është një shtëpi në Karposh, me sipërfaqe prej 261 metrash katrorë, në vlerë prej 9.254.250 denarë ose 151.709 euro. Kjo shtëpi, sipas të dhënave në fletën e anketimit, është blerë në vitin 2021.
Në fund ai në listën e pasurisë ka paraqitur edhe një tokë ndërtimore në Tetovë me sipërfaqe prej 469 metrash katrorë, në vlerë prej 8.841.600 denarë, e cila është në pronësi të prindërve të Taravarit, dhe bazë për përvetësim është trashëgimia.
Ka deklaruar se ka vetëm një veturë Volvo në vlerë prej 3.070.000 denarë, e blerë në vitin 2016. Taravari jep edhe detaje të depozitave bankare, të tij dhe të familjarëve të tij, por pa shuma specifike. Ministri ka raportuar edhe një kredi prej pak më shumë se 4,5 milionë denarë të marrë në vitin 2021.
Si pronë tjetër, Taravari ka deklaruar se posedon bizhuteri ari, në pronësi të bashkëshortes së tij, e cila i ka marrë dhuratë në vitin 1998, në vlerë prej një milion e treqind e pesëdhjetë mijë denarë, si dhe piktura artistike të vitit 2018 në vlerë prej 245 mijë denarë. Më herët, Aleksandar Nikoloski, i cili tani është ministër, kolegë i Taravarit, ka akuzuar këtë të fundit, (Taravarin) se ka marrë një shtëpi dhuratë, sepse e ka kthyer kursin drejt LSDM-së dhe BDI-së.
