Lideri i Aleancës për Shqiptarët, Ziadin Sela, nga tubimi zgjedhor në Çashkë, theksoi se bashkimi i shqiptarëve fillon pikërisht nga kjo komunë, e cila për vite me radhë ka ndjerë mungesën e përfaqësimit të denjë.
“Kur jemi të vendosur dhe kur rezistojmë, gjithsesi do të realizojmë qëllimet tona. Ndjej kënaqësi që pas shumë vitesh është arritur të vendoset mësimi në gjuhën shqipe në Çashkë. Kjo ndodh kur bashkohemi rreth një kauze. E tillë është edhe kauza e Suat Shaqirit. Kështu fitojmë – kur jemi bashkë,” deklaroi Sela.
Ai shtoi se qëllimi i vizitës në Çashkë nuk ishte për fjalime të mëdha, por për të dëgjuar njerëzit e kësaj komune dhe për të njohur nga afër problemet e tyre.
“Këtu nuk jemi për fjalime të mëdha, por për t’ju dëgjuar ju. Ju jeni ata që mund të flisni për problemet, për zgjidhjet dhe për rrugën që na bashkon drejt qëllimeve tona politike,” tha ai.
Sipas sondazheve të fundit, kandidati i AKI-së, Suat Shaqiri, pritet të fitojë bindshëm në zgjedhjet e 19 tetorit në Çashkë, duke sjellë një ndryshim historik dhe një drejtim të ri për komunën.