Ndikimi rus është i pranishëm në vend dhe rajon, por nuk kam informacione për ndonjë tentim të theksuar. Kështu vlerësoi ambasadorja amerikane në vend, Anxhela Ageler, duke u përgjigjur mbi influencën lindore në këto zgjidhje, që shpesh është thënë nga politikanët vendor. Për diplomaten amerikane me rëndësi është që qytetarët t’u parashtrojnë pyetje kandidatëve para se të votojnë. Gjëja më e rëndësishme për qytetarët për zgjedhjet e ardhshme është të edukohen mirë për procesin dhe për kandidatët që do të marrin pjesë në të, shton ambasadorja, Ageler.
“Nuk jam e njoftuar për ndonjë ndikim specifik, siç e përshkruani. Besoj që është aty, sepse në përgjithësi është në këtë rajon, por më e rëndësishmja siç shkojmë drejt kësaj periudhe të zgjedhjeve, është që qytetarët e këtij vendi të parashtrojnë pyetje deri tek kandidatët dhe gjatë votimit të reflektojnë prioritetet e tyre në vazhdimin tutje. Për mua kjo është më me rëndësi, dhe sigurisht ata edukohen për procesin dhe për kandidatët, pavarësisht se kush mund të ndërhyjë, ky është mjeti më i rëndësishëm që ata kanë.”, – deklaroi ambasadorja e ShBA-së në vend, Anxhela Ageler, përcjell PRESSonline.al
Për shtrirjen e frymës ruse në vend, disa herë kanë deklaruar zyrtarët e vendit, së fundmi edhe në konferencën vjetore të Qeverisë, e për strehë që i bëjnë vend depërtimit rus fajësojnë partitë politike dhe qendrat e ndryshme që nuk rreshtohen pas vlerave dhe demokracisë evropiane.