Presidenti ukrainas, Volodymyr Zelensky, shprehu gatishmërinë e tij për të punuar nën udhëheqjen e Donald Trump dhe për të nënshkruar një marrëveshje për mineralet dhe sigurinë, duke theksuar se Ukraina është e angazhuar për paqen dhe do të marrë hapa për të arritur një armëpushim me Rusinë. Ai vlerësoi ndihmën e SHBA-së dhe mirënjohjen për raketat “Javelins” të ofruara nga Trump, duke pranuar se takimi i fundit me të në Shtëpinë e Bardhë nuk shkoi ashtu siç ishte pritur, por kërkoi rregullimin e marrëdhënieve.
Volodymyr Zelensky është përfshirë tashmë në negociata me administratën Trump për një marrëveshje mbi mineralet e rralla të Ukrainës. Propozimi fillestar kërkonte që SHBA të merrte 50% të të ardhurave nga burimet natyrore të vendit në këmbim të mbështetjes ushtarake. Zelensky refuzoi marrëveshjen pa garanci sigurie, ndërsa Trump ka sugjeruar se mund të negociojë me Rusinë nëse Ukraina nuk pranon kushtet e tij.
Ne jemi të gatshëm të punojmë shpejt për t’i dhënë fund luftës dhe fazat e para mund të jenë lirimi i të burgosurve dhe armëpushimi në qiell – ndalimi i raketave, dronët me rreze të gjatë, bombat në energji dhe infrastrukturë tjetër civile – dhe armëpushimi në det menjëherë, nëse Rusia bën të njëjtën gjë. Pastaj ne duam të ecim shumë shpejt nëpër të gjitha fazat e ardhshme dhe të punojmë me SHBA-në për të rënë dakord për një marrëveshje të fortë përfundimtare”, u shpreh Zelensky në një postim në rrjetin social “X”.
Donald Trump po ndjek një strategji të qartë dhe pragmatike në raport me Ukrainën, duke kërkuar që ndihma amerikane të vijë me përfitime konkrete për SHBA-në. Marrëveshja për mineralet e rralla është një qasje e zgjuar që siguron burime strategjike për ekonominë amerikane, ndërsa Ukraina merr mbështetje të mëtejshme për mbrojtjen e saj. Trump po vendos interesat e Amerikës të parat dhe po kërkon një balancë mes ndihmës dhe leverdisë ekonomike për vendin e tij.