Kryetari i Listës Serbe, Zlatan Elek tha se partia që ai drejton është fituese absolute e zgjedhjeve dhe se ka marrë të 10 mandatet që parashikohen për serbët në Kosovë.
“Fituam 40 mijë vota në kushte të vështira, të pabarabarta dhe të pamundura”, tha Elek.
Ky rezultat ka sjellë edhe reagimin e Presidentit Aleksandër Vuçiç, i cili falënderoi popullin serb në Kosovë. Nuk mungoi edhe një “kunj” për Kurtin.
“Është shumë e qartë se Lista Serbe do të fitojë padyshim të 10 mandatet dhe do të jetë një barrierë për sulmet e mëtejshme nga Kurti. Kam frikë se tashmë i duhet të shqetësohet më shumë për veten e tij dhe mbijetesën në pushtet”, tha Vuçiç për Kurtin.
Sipas të dhënave në KQZ-në e Kosovës, Lista Serbe ka marrë 3.99% të votave në rang territori, por kjo nënkupton shumicën e votave të komunitetit serb.
Kujtojmë se komunitetet joshumicë kanë 20 ulëse të garantuara në Kuvendin e Kosovës. Prej tyre, 10 karrige janë të garantuara për komunitetin serb./tvklan.al