48 oficerë policie mbetën të plagosur nga protesta e fundit në Beograd dhe 77 persona u arrestuan, përfshirë një të mitur.
Të dhënat u bënë të ditura nga ndihmësdrejtori i policisë serbe, Dejan Lukoviç, duke folur për stacionin televiziv TV Prva. Sipas Lukoviç, policia synon të ngrejë 35 kallëzime penale dhe 22 kundërvajtje administrative.
“Ne vazhdojmë të sqarojmë të gjitha rrethanat, të krijojmë një pamje të plotë të ngjarjeve dhe të identifikojmë individët e mbetur, organizatorët.
Në bashkëpunim me prokuroritë dhe shërbimet kompetente të sigurisë, ne do ta çojmë këtë çështje deri në fund”, theksoi ai.
Siç sqaroi ai, njëri nga të plagosurit, një oficer i xhandarmërisë, pësoi lëndime të rënda fizike, megjithatë ai ndodhet jashtë rrezikut për jetë.
“Policia fillimisht veproi me përmbajtje maksimale, por pas përshkallëzimit të incidenteve, u përdorën masa minimale shtrënguese”, tha Luković.
Kreu i Zyrës së Prokurorit të Lartë të Beogradit, Nenad Stefanovic, kishte deklaruar më parë se të gjithë ata që ishin të përfshirë në sulmet ndaj policisë dhe institucioneve shtetërore gjatë protestave do të identifikoheshin dhe do të mbaheshin përgjegjës.
Nga ana e tij, Presidenti serb Aleksandar Vuçiç ka theksuar se lëvizja protestuese ka shkaktuar dëme të konsiderueshme në sistemin arsimor dhe stabilitetin e brendshëm të vendit.
Ai pretendon se demonstratat janë të koordinuara nga jashtë, me qëllim destabilizimin e Serbisë, minimin e ekonomisë dhe paralizimin e transportit. Në fakt, ai vlerësoi se dëmi i mundshëm nga protestat mund të arrijë në 800 milionë euro.