Policia e Kosovës pas pranimit të autorizimit nga gjykata dhe pas ndërmarrjes së veprimeve hetimore ka konfirmuar se një urë është lëshuar për qarkullim pa përfunduar testimi final.
Sipas raportit 24 orësh të Policisë së Kosovës bëhet e ditur se rasti ka ndodhur më 31.12.2024 rreth orës 10:00 në magjistralen Prishtinë-Gjilan, konkretisht në Badoc.
Tutje thuhet se në koordinim me prokurorin është intervistuar një i dyshuar mashkull kosovar, ndërsa rasti është cilësuar si “Mbikëqyrja e pandërgjegjshme e trafikut publik”.
“Badovc, Magjistralja Prishtinë-Gjilan / 31.12.2024 – 10:00. Policia e Kosovës pas pranimit të autorizimit nga gjykata dhe pas ndërmarrjes së veprimeve hetimore ka konfirmuar se një urë është lëshuar për qarkullim pa përfunduar testimi final. Në koordinim me prokurorin është intervistuar një i dyshuar mashkull kosovar. Në konsultim me prokurorin rasti vazhdon në procedurë të rregullt”, thuhet në raport.
Ndryshe, zëvendësministri i Infrastrukturës, Hysen Durmishi kishte deklaruar se ura e Badocit është stabile.
Kjo deklaratë e Durmishit kishte ardhur pas disa reagimeve ku ka pasur kritika se kjo urë është lëshuar për qarkullim pa u testuar.
“Ura e Badocit është stabile. Dje dhe sot po mundohen të ngjallin pasiguri te qytetarët me rastin e hapjes së urës së Badocit”, ka theksuar ai, transmeton Telegrafi.
Tutje, Durmishi kishte pohuar se ura e Badocit është projektuar e ndërtuar me standardet më te larta të projektimit e ndërtimit.
“Gjatë të gjitha fazave janë kryer inspektimet profesionale, përfshirë këtu atestet paraprake të materialeve, testimet të vazhdueshme të betonit e armaturës deri në finalizimin e saj. Prandaj me përgjegjësi të lartë profesionale deklaroj se Ura e Badocit është shumë stabile”, shtoi tutje ai.