Universiteti i Tetovës ka filluar procedurën ligjore për shkarkimin e Artan Grubit, i cili është docent në Fakultetin Juridik, Departamenti i Gazetarisë.
Për shkak të mungesës disaditore pa shpjegime ndaj tij janë marrë masa, thotë dekani i Fakultetit Juridik, Safet Emruli.
“Personi i përmendur që nga java e kaluar nuk është paraqitur në vendin e punës, që do të thotë se nuk i ka përmbushur obligimet nga Ligji për Marrëdhëniet e Punës dhe Ligji për Arsimin e Lartë”. Rastin e kemi proceduar konform dispozitave ligjore dhe kemi filluar procedurën për marrjen e masave përkatëse në përputhje me ligjin. Së shpejti do të njoftoheni për vendimin që do të marrim si universitet”, tha Emruli për Alast TV.
Grubi prej vitit 2012 punon në Universitetin e Tetovës. Në korrik ai refuzoi apanazhin dhe iu kthye profesionit të tij të vjetër në Universitetin e Tetovës si profesor i gazetarisë.
Ish-zëvendëskryeministri u largua nga vendi në dhjetor dhe prej asaj kohe rezulton i zhdukur. Ndaj tij dhe ish-drejtorit të Lotarisë Shtetërore, Përparim Bajrami janë lëshuar urdhër për korrupsion dhe shpërdorim detyre.