Lideri i BDI-së, Ali Ahmeti, theksoi se Marrëveshja e Ohrit mbetet një dokument kyç për ruajtjen e stabilitetit dhe barazisë në vend.
Gjatë një tubimi në Zhelinë, ai gjithashtu theksoi se BDI ka qenë dhe mbetet një forcë kryesore në mbrojtjen e të drejtave të shqiptarëve dhe të gjitha komuniteteve, si dhe në sigurimin e një përfaqësimi të drejtë në të gjitha nivelet e pushtetit.
Ali Ahmeti ka bërë thirrje për unitet, sic tha, që të hiqen etiketimet për shqiptarët por edhe hiqen kufijtë.
ALI AHMETI – KRYETAR I BDI-së
“E mbani mend kur filloi Korridori 8 para një viti? Dy muaj ditë nuk u ndalën mediat “Golema Albanija”! Çka ndodhi tash? Ne nuk luftojmë për Shqipëri të Madhe, ne luftojmë për Evropë. Ne luftojmë që të hiqen kufijtë mes shteteve si e keqja më e madhe e njerëzimit. Dhe ajo e keqe të hidhet pas krahëve, të mos na përsëriten ngjarje e histori që me gjak e me sakrifica të mëdha I kemi paguar. Por, bashkë t`i heqim këto të këqija që I kanë ndodhur rajonit dhe Ballkanit. Të hiqen kufijtë. Të jetojnë njerëzit pa kufij, të lirë.”
Ndërkohë, Bashkimi Demokratik për Integrim shpreh shqetësimin e thellë për ndryshimet në Ligjin për Mbikëqyrjen Inspektuese, të cilat, sipas tyre, rrezikojnë pavarësinë dhe funksionimin efektiv të Inspektoratit për Përdorimin e Gjuhëve.
Sipas BDI-së, me ndryshimet e fundit, Kuvendi ka hequr statusin e personit juridik për të gjitha inspektoratet, duke i vendosur nën kontroll të plotë të ministrive përkatëse.
Në përputhje me parimin ligjor se ligji special ka përparësi ndaj ligjit të përgjithshëm, sipas integristëve, këto dispozita nuk mund të ndryshohen apo të anulohen nga një ligj i përgjithshëm siç është Ligji për Mbikëqyrjen Inspektuese.
BDI
“Prandaj, qeveria dhe Ministria e Drejtësisë nuk kanë asnjë bazë ligjore për të vendosur këtë inspektorat nën varësinë e plotë të ministrisë dhe duhet menjëherë të sigurojnë se ky institucion do të vazhdojë të funksionojë në mënyrë të pavarur, siç e përcakton ligji. Çdo përpjekje për të reduktuar pavarësinë e Inspektoratit për Përdorimin e Gjuhëve do të konsiderohet si sulm ndaj të drejtave gjuhësore të qytetarëve shqiptarë dhe një hap prapa në respektimin e barazisë gjuhësore të garantuar me Kushtetutë dhe Marrëveshjen e Ohrit.”
BDI paralajmëron se nuk do të qëndrojë indiferent ndaj këtij rreziku dhe do të ndërmarrë të gjitha masat institucionale dhe demokratike për të siguruar që Inspektorati për Përdorimin e Gjuhëve të mbetet një institucion i pavarur dhe i aftë për të mbrojtur të drejtat gjuhësore të qytetarëve. /tvklan.mk