Një person ka mbetur i vdekur si pasojë e therjes me thikë sot në fshatin Zllakuqan të Lipjanit, ndërsa një tjetër është plagosur. Rastin e ka konfirmuar për Gazetën Online Reporteri.net zëdhënësja e Policisë së Kosovës për rajonin e Prishtinës, Flora Ahmeti, e cila ka bërë me dije se viktima është një 57-vjeçar. Sipas Ahmetit, e gjithë ngjarja ka ndodhur si pasojë e një konflikti mes disa personave, e që më pas situata eskaloi në përdorimin e mjetit të mprehtë.
“Rreth orës 13:00, policia ka marrë informatën për një vrasje që ka ndodhë në fshatin Zllakuqan të Lipjanit. Menjëherë pas marrjes së informatës policia ka dalë në vendin e ngjarjes dhe ka ndërmarrë të gjitha veprimet e nevojshme që konsistojnë në hetimin e rrethanave që karakterizojnë ngjarjen. Bazuar në informacionet e para janë ngritur dyshimet se një mosmarrëveshje mes disa personave ka rezultuar me plagosjen e rëndë të dy personave, dyshohet me mjet të mprehtë thikë. Njëri nga personat e lënduar ka vdekur, ndërsa i lënduari tjetër është dërguar për tretman mjekësor. Vdekjen e viktimës mashkull, rreth 57 vjeç, e ka konstatuar ekipi mjekësor në QKMF në Magure”, tha ajo.
Më tej Policia njoftoi se lidhur me rastin janë arrestuar dy persona të dyshuar, teksa hetuesit policorë në koordinim me Prokurorinë kanë marrë të gjitha veprimet e nevojshme hetimore që ndihmojnë në zbardhjen e rrethanave të rastit.
“Aktualisht hetuesit policor në koordinim me prokurorinë, po ndërmarrin veprimet hetimore për për ndriçimin e plotë të rastit, ndërkohë që dy persona të dyshuar janë arrestuar”, tha Ahmeti më tej./Reporteri.net