13 korrik 2024 – Një super talent i ri siç duket po rritet te FK New Stars nga Shkupi. Ai është Ajan Memeti (i lindur më 24 nëntor 2015), i cili po shfaq aftësitë e tij mahnitëse në futboll, shkruan Open-TV.
Gjatë muajit qershor të këtij viti në Prishtinë, Memeti ka marrë pjesë dhe është përzgjedhur në mesin e futbollistëve të talentuar nga Elite Sports L.L.C (ndërmarrje e hapur për partneritet me të gjitha federatat, klubet, organizatat sportive shkollore), për pjesëmarrje në një turne ndërkombëtarë të futsalit në Francë, më 21 shtator.
“Ajani kishte një paraqitje të shkëlqyeshme gjatë seancës së përzgjedhjeve. Ai shënoi rezultate të mira në të gjitha elementet e vlerësimit në krahasim me bashkëmoshatarët e tij, duke u veçuar me rezultatin më të lartë në goditjen më të fortë. Sugjerimet e trajnerëve për Ajanin mbeten që të zvogëlojë pak posedimin e topit, pasi që në futsal mbajtja e topit shpeshherë penalizon ekipin, megjithëse koha e tij e mbajtjes së topit në krahasim me numrin e pasimeve mbetet korrekte. Mbi të gjitha, Ajani bie në sy për lojën e tij inteligjente, leximin e lojës dhe shfrytëzimin e hapësirave të lira. Ajanit i urojmë suksese dhe shpresojmë ta shohim përsëri së shpejti”, thuhet në komentin e Stafit mbi lojen dhe sugjerimet shtesë.
“Këtë sezon kemi bërë 4 seanca të përzgjedhjeve. Më 22 qershor ku e kemi perzgjedhur Ajanin, kanë qenë përzgjedhje specifike për të lindurit në vitet 2014 dhe 2015, për lojë në FUTSAL, dhe krijim të ekipit për pjesëmarrjen në kualifikime në European Futsal Cup U11 qe mbahet në Sttrasbourg më 21 shtator, dhe Ajani ka pasur fatin fal rezultateve të mira, të përgjedhet pjese e ekipit prej 9 lojtarëve që do marrin pjesë në këtë turnir”, thotë Burim Haxhiu nga Elite Sports L.L.C.
Fjalë të mira për djaloshin me origjinë nga Orizarja e komunës së Likovës ka edhe trajneri i tij Dino Bekirovski.
“Ajan Memeti është i lindur më 24 nëntor 2015. Djaloshi i ri stërvitet dhe luan me ekipin e FK New Stars nga Shkupi. Ai ushtron plot dy vite dhe merr pjesë në Ligën e Fëmijëve në FFM për gjeneratën 2015. Ai është majtak, por shumë mirë e shfrytëzon edhe këmbën e djathtë. Ajani mund të luaj në dy pozicione, si alo e majtë dhe mesfushor. Për këto dy vite ka përparuar shumë në futboll, është i disiplinuar, teknikën e ka në nivel të lartë dhe ka nuhatje në përfundimin e aksionit. I mirë është edhe në mbrojtje. Me një fjalë është potencial i madh. Në disa raste ka luajtur edhe për gjeneratën 2014, ku ka luajtur në nivel të lartë”, deklaroi trajneri Bekirovski.